Klokka 01.15 natt til laurdag kom flyteknikar til staden for å hjelpa til med å flytta helikopteret.

– Me skal ta av rotorblada, heisa helikopteret opp på NAF-bilen og frakta det til basen vår i Bergen. Eg har sagt at det vil ta minst to timar, sa Norsk Luftambulanse sin flyteknikar, Sven Erik Hansen, då han starta demonteringa i natt.

Ramma rotoren

Det var full utrykning til bilulukka som vart meldt like før 16.30. Ulukka hende då ein bil som vart frakta i ein tilhengar fall av og traff ein annan bil, som vart knust i fronten. Ei kvinne vart sendt til Voss sjukehus, og skadeomfanget hennar er ukjent.

Under den omfattande redningsaksjonen kom den eine av brannbilane borti rotoren på ambulansehelikopteret, og dette får ikkje røra seg før ekspertise frå Oslo har saumfare det.

Lange køar

Alt i løpet av første timen etter ulukka, var det fleire hundre meter med kø på begge sider av ulukkesstaden. Det vart etter ei tid organisert omkøyring på gamlevegen mellom Bolstadøyri og Vassenden, og personbilar fekk etter kvart sleppa forbi ulukkesstaden.

Då vegen igjen vart heilt stengd klokka 01.15 stod det alt ein del vogntok og venta, og saman med nyankomne i køen måtte dei bu seg på nye timar på vent.

Liten smell, store konsekvensar

Flyteknikar Hansen måtte hentast frå Oslo, noko som er årsaka til at helikopteret vart ståande i vegen så lenge. Å flytta det utan at ekspertisen hadde sett på det, var ikkje aktuelt. Det er fabrikken i Tyskland som vil avgjera kva som vidare lyt gjerast med helkopteret, seier Hansen.

Konsekvensane vart dermed store etter ein augneblink med upresisjon frå brannbilføraren. Bilen kom borti rotorbladet med glaset på eine blålyset.

– Det var eit uhell, men på brannvesenet sine vegne kan eg berre beklaga overfor bilistane som no står i kø, sa vakthavende brannsjef på Voss, Arnfinn Halringjo, til bt.no etter hendinga.