Avisa Hordaland

Publisert: 12.07.08 kl. 08.12
Skribent: Stine S. Carlsen
E-post: ssc@avisa-hordaland.no

– Heilt utruleg! seier svigermor Anny Ekse om svigersonen Bjørn Hugo Thomassen

som har sykla heile vegen frå Vannøya i Tromsø til Ekse i Eksingedalen for å delta i 75-årsdagen hennar.

Bjørn Hugo Thomassen bur på Vannøya i Tromsø saman med kona Britt Jane Ekse, som er dotter av Anny. Britt Jane synst sykkelturen var eit sprekt nyhende, og tipsa like godt «Hordaland» om saka. Thomassen visste ingenting om at kona hadde tipsa avisa, men sporty som han er, stilte han opp og fortalde om turen.

STARTA SOM EIN SPØK

– Det heile starta som ein spøk for nokre år sidan då eg briska meg med å seia at eg skulle kjøpa meg trøsykkel og sykla til Eksingedalen frå Tromsø. Denne uttalen blei ikkje så fort gløymd, og etter kvart bestemte eg meg for å halda det eg hadde sagt, seier ein lattermild Bjørn Hugo Thomassen. Laurdag ettermiddag kom Thomassen vel fram til svigermora i Eksingedalen, og han seier at turen har vore svært krevjande fysisk for ein som berre er hobbysyklist.

– Eg kjøpte sykkelen i fjor haust, og har ikkje vore noko særleg aktiv i sykkelmiljøet før. Å byrja rett på denne turen utan særleg erfaring ville bli for hardt, så eg trena meg opp ved å sykla 200 mil på førehand, fortel han.

DRAGSUG TRÅ TRAILERAR

– Turen tok i alt 15 dagar, der eg hadde ein kviledag i Brønnøysund. Dagleg sykla eg 10 – 16 mil. Eg hadde pausar to-tre gonger for dagen for å få i meg mat, men elles var det høgt tempo, seier Thomassen. Han forklarar at bror hans var med å sykla kystriksvegen til Trondheim, og slutta turen der. Men Thomassen køyrde løpet ut og sykla hovudvegen frå Trondheim på eiga hand. – Det var mykje stygg trafikk. Noko eg tykkjer var spesielt utriveleg var når store trailerar passerte forbi meg. Dei tok lite omsyn, og eg kjende sterke dragsug, seier han.

OVER FIRE FJELL

Anny Ekse heime i Eksingedalen visste på førehand at svigersonen kom. Ho tykkjer han er tøff som vågar å sykla heilt frå Tromsø. – Det er heilt utruleg, seier ho. Anny fyller 75 år den 20. juli, og dotter hennar Britt Jane kjem med fly (ikkje sykkel) 17. juli for å vera med på feiringa. Thomassen fortel at han trefte mange andre syklistar etter vegen.

– Heilt utruleg! seier svigermor Anny Ekse om svigersonen Bjørn Hugo Thomassen som har sykla heile vegen frå Vannøya i Tromsø til Ekse i Eksingedalen for å delta i 75-årsdagen hennar.

– Dei fleste sykla strekninga Nordkapp – Lindesnes. Men medan dei syklar landet frå nord til sør, nøyer eg meg med Tromsø – Eksingedalen i første omgang, seier han.

– Eg har i alt sykla over fire fjell, Dovrefjellet, Sognefjellet, Vikafjellet og Nesheimsfjellet. Så det var mange bratte stigningar, og eg kjende mjølkesyra godt i beina, seier Thomassen.

– Då eg kom til siste etappe, Nesheimsfjellet, var eg så tappa for energi at eg måtte trilla sykkelen opp bakkane, fortel han.

IKKJE SYKKEL HEIM ATT

– Eg kjenner det godt på kroppen enno. I tillegg til at eg er stiv og støl, var sykkelshortsen eit sant mareritt å ha på seg! Eg har gnagsår både her og der, seier han spøkefullt.

– Korleis er det med heimreisa? Tek du sykkelen fatt då òg?

– Nei, det blir ikkje aktuelt! Då tek eg fly heim att med kona, svarar han. 

Interaktivt