Det dreiar seg om 19 år gamle Martin Seim, som er oppvaksen på Vossestrand og seinare var elev ved musikklina på Voss Gymnas. No studerer han musikk i Oslo, spelar gitar, og er medlem av rockebandet Acic Bullet.

Meir enn 25 land med

I ei pressemelding frå bandet vert det opplyst at The Global Battle of the bands er største talentkonkurranse i verda for band av alle sjangarar. Meir enn 25 land er med i tevlinga, og vinnaren i Oslo vil seinare få delta under finalen i den internasjonale tevlinga, i Bucharest (Romania) 2. juni. Undervegs har meir enn 80 band konkurrent for å nå fram til NM-finalen i Oslo.

Har base i Oslo

Acid Bullet er i fylgje pressemeldinga eit rockeband med påverknad av alt frå Led Zeppelin og Deep Purple til moderne retrorock som Jet og Arctic Monkeys. Frontfigur er vokalist David Castillo (25) frå Peru, som saman med broren Luis starta gruppa i Lima tidleg på 2000-talet. David har no flytta til Noreg, der gruppa har base i Oslo, og tre norske medlemer i tillegg til ein frå Ukraina.

Store premiar

Dersom Acid Bullet ikkje berre vinn finalen i Oslo sundag, men også verdsfinalen i Bucharesti, vil dei få ein premie på 100.000 US-dollars. I tillegg er vinnaren garantert ein turné i England og får gjera opptak i eit platestudio i London.