– Auking av dei såkala LAM-midlane er eitt av tiltaka som vert førslått i den nye Idrettsmeldinga, som skal presenterast seinare i juni, opplyser stortingsrepresentanten frå Voss. Det er såleis ein aldri så liten lekkasje ho serverer for lokalavisa!

39 mill ekstra

– Og i den store potten betyr dette nokså mykje pengar, understrekar Magnusson.

Ut frå dagens tippenykkel, der ein i år har drygt 1,558 milliardar kroner til fordeling, vil 12,5 prosent innebera 195 millionar.

Auken på 2,5 prosent utgjer åleine 39 millionar, pengar som dermed kjem ekstra opp i hatten til fordeling.

Den store potten vert fordelt jamt over landet, basert på folketal. Rettare sagt: talet på innbyggjarar i målgruppa 6-19 år. Idrettsråda fordeler midlane i sine resepktive kommunar, medan pengane vert overført direkte frå Norges Idrettsforbund til det einskilde laget.

Totalt for Voss kommune vil tildelinga auka frå ca 450.000 kr til drygt 560.000, ut frå noverande totalpott i Norsk Tipping.

– Gladmelding

– Verkeleg ei gladmelding, seier Heidi Nedkvitne, som er leiar for Voss Idrettsråd. – Det betyr kort og godt meir aktivitet, eit breiare tilbod for born og unge.

– Du trur ikkje at verknaden i staden blir mindre dugnad og færre kakelotteri?

– Dugnad og kakelotteri kjem me nok ikkje bort frå uansett. Pengane me fordeler i idrettsrådet er i tillegg til medlemstal også baserte på aktivitet. Dei laga som kan visa til størst aktivtet, får såleis best utteljing. Eit effektivt og rettferdig prinsipp, seier Nedkvitne, og får full støtte av Magnusson, som understrekar at nett desse midlane har stor effekt for den generelle folkehelsa.

– Anlegg neste?

Ordførar Hans-Erik Ringkjøb applauderer også nyordninga. – Bra at det kjem endå meir pengar til den jamne drifta av laga, slår han fast.

Saman med grasrotandelen og momskompensasjon, er auken i direktetilskotet eit viktig bidrag til auka aktivitet. Men Ringkjøb meiner det i neste omgang trengst ei vidare justering av tippenykkelen, slik at det også kjem ein auka årleg pott til bygg og anlegg.

– I dag lyt me her på Voss venta i ca fem år på spelemidlar, og det er langt frå godt nok. Ei endring som kunne halvert ventetida, må vera eit minstemål, synest vossaordføraren.

Kulturen taper?

Men sidan spelemidlane både skal dekka idrett og kultur, vil det ikkje då vera slik at ei heving av prosenten til idrettsføremål inneber ei tilsvarande senking av potten som går til kultur?

– Nei, slik vert det ikkje, seier Hilde Magnusson.

– Temaet vart drøfta på vårt siste landsmøte, og då var konklusjonen klar. Kulturen skal over på statsbudsjettet, og vil såleis ikkje tapa nokon ting som helst, forsikrar vår lokale stortingsrepresentant, som til dagleg er å finna i kommunal- og forvaltningskomiteen.