Tur til Yksendalsstølen
I høve Eksingedalsmarknaden var det fellestur til Øksendalsstølen. / Les saka
Alt om jakt i tre bøker
Publisert: 16.10.09 kl. 22.06
Skribent: Geir Geitle
E-post: gg@avisa-h.no
LITTERATUR: Tun Forlag gjev i haust ut tre bøker om jakt som fortel mykje av det jegerane treng å vita.
Kanskje noko nyttig å kosa seg med når haustregnet trommar ned i jaktterrenget?
Ole Kirkemo/Henrik Sæhle:
Jegerhåndboka
Jon Erling Skåtan & Jan
Thomassen:
Elgjakt. En praktisk innføring
Tore Andestad:
Fulltreff. Slik unngår du skadeskyting
Alle bøkene: Tun Forlag
Det er ei interessant bokpakke Tun Forlag gjev ut. Den første av dei tre, Jegerhåndboka, gjev deg svar på det meste du lurar på om jakt, og er ei av våre mest omfattande jaktbøker nokosinne. Boka har stoff om utstyr og våpen, om korleis bli ein betre jeger, og korleis finna jaktterreng.
Eit mål med boka er at ho skal setja jegerar på sporet til jakt på andre artar. Med rekordstore storviltstammer er tida moden for alle som drøymer om jakt på hjort eller elg. Det same gjeld jakt på rådyr. Mange jegerar er heller ikkje klare over kva potensiale som ligg i jakt på duer, ender og gjæser, meiner forfattarane.
Forfattarane er begge drivne og allsidige jegerar, Ole Kirkemo er kjend som mangeårig redaktør i bladet Jakt og fiske og har tidlegare gjeve ut 11 jakt- og fiskebøker.
Boka om elgjakt er eit oppslagsverk som lenge har vore etterspurt. Boka er skriven av Jon Erling Skåtan som har jakta i over 25 år, medan fotografen Jan Thomassen to gonger er kåra til årets naturfotograf.
Sist, men ikkje minst kjem boka som omhandlar alle jegerane sitt mareritt – skadeskyting. Hjorteviltjakta kan enda med skadeskyting og fortviling. Skadeskyting kan vera ei vond oppleving som kan sitja i for lang tid. I boka får du nødvendig kunnskap og tips som gjer deg til ein sikrare og tryggare skyttar og hjorteviltjeger.
– Dette er kanskje årets viktigaste jaktbok. Skadeskyting er dessverre framleis eit problem i Noreg, seier Johan Hval, forlagsredaktør for jaktbøker i Tun Forlag.
– Eg trur denne boka vil vera eit viktig og rett steg på vegen til målet om å unngå all skadeskyting i norsk hjorteviltjakt, held han fram.
Tore Andestad si bok er mellom anna basert på Norges Jeger- og Fiskerforbund si omfattande undersøking «Betre jakt». Undersøkinga omfattar 10.000 norske hjorteviltjegerar og analyser av 12.000 skot mot hjort, elg og villrein. Andestad er ein erfaren jeger, pedagog og kursinstruktør på jegerprøvekurs. Han har òg fått Norges Jeger- og Fiskerforbunds viltstellpris for 2006–2008.
