Elvepadlaren vart teken av den frådande elva, og ført nedover. Redningsmannskapa fryktar at mannen er omkomen.

– Det kokar i elva, kommenterer brannsjef David Skjerven på Voss. To helikopter har søkt tett i elva frå Palmafossen og oppover til brua over mot Meringen.

Det einaste dei har funne så langt, er hjelmen til mannen, noko som neppe er eit opplyftande teikn.

Mannen tilhøyrde eit fylgje på fire personar, som køyrer ein britiskregistert bil. No vert det søkt etter den sakna mannen frå elvebreidda og frå bruene i området.

Store redningsmannskap har rykt ut, både frå Voss og Bergen. Litt over klokka 20 trekte store delar av mannskapa seg ned att til Voss Brannstasjon, der dei ifylgje brannsjef Skjerven etablerer stab.

Det er no sett opp vaktpostar ved alle bruene nedover. Raundalselva er uvanleg store etter mykje snøsmelting siste tida. Siste døgeret har det toppa seg med mykje regn i tillegg. Lokalkjende folk omtalar det som hasardiøst å ferdast i elva under slike forhold. Likevel skal det ha vore stor padleaktivitet i Raundalselva gjennom delar av laurdagen.

Den sakna vart sitjande fast, og i samband med at han prøvde å koma seg laus, vart han teken av straumen.

Mannskap frå Voss Røde kors hjelpkorps har rykt ut frå Palmafossen.

Hordaland kjem tilbake med meir.