Kollisjonen ved Bolstadtunnelen fredag (biletet) var den einaste med alvorleg personskade.

Politiet fekk klokka 17.55 sundag melding om at tre bilar hadde kollidert ved Bulken. Ti munutt seinare kom melding om at tre til var hamna i ein kjedekollisjon i køen bak. To personar vart sende til legesjekk på Voss sjukehus, med lettare skadar. Det oppstod lange køar i begge retningar. No er vegen rydda, og trafikken går fritt igjen.

Fredag

Ei kvinne (28) vart fredag ettermiddag alvorleg skadd ved Bolstadtunnelen. Ho fekk ein bil som vart frakta i tilhengjar i fronten, då denne bilen fall av tilhengjaren. Bilen som drog tilhengjaren hadde i forkant kome borti autovernet.

I samband med denne redningsaksjonen hende eit nytt uhell, då eine brannbilen krasja blålyset borti eitt av rotorblada på ambulansehelikopteret. Det førte til at helikopteret vart ståande i vegbana, til hinder for trafikken, fram til det vart frakta bort klokka 04.15 natt til laurdag.

Laurdag

Litt før klokka 14 laurdag kom ein ung mann frå det utan vesentlege skadar då bilen hans køyrde i fjellveggen utanfor Holemarktunnelen ved Evangervatnet.

I nitida laurdag kveld køyrde ein trailer i grøfta på Kvåle, med ein stupfull sjåfør ved rattet.

Sundag

Sundag var roleg fram til litt etter klokka 17. Då køyrde ein bil av vegen ved Saue camping, og fire personar vart sende til sjukehussjekk, utan at nokon av dei var alvorleg skadde.

Ein knapp time seinare small det altså igjen, mellom seks bilar ved Bulken. Til alt hell vart det igjen berre køyretøya som fekk vesentleg skade.