Hordaland fekk mandag morgon fleire telefonar frå folk som hadde merka skjelvet godt.

Heile huset rista - dører opna seg

– Heile huset rista, og kjøkendøra opna seg av seg sjølv. Det er skummelt med slike hendingar her som me bur så bratt, så det er godt å høyra at det var jordskjelv og ikkje ras, seier Vibeke Mykkeltveit som bur på Mykkeltveit i Evanger.

Ifylgje avdelingsingeniør ved Institutt for geovitskap ved Universitetet i Bergen, Berit Marie Storheim, hadde skjelvet som inntraff klokka 09.03 mandag morgon, ein styrke på 3,0 på Richters skala. Førebelse målingar syner at episenter truleg var ein stad mellom Vaksdal og Norheimsund.

– Etter tilbakemeldingar frå publikum å rekna er det truleg nærare Vaksdal enn Norheimsund, seier Storheim.

– Ikkje daglegdags

At skjelvet merkast kraftig i Vaksdal, vert stadfesta av Bjørn Øivind Krogsrud, som kontakta Hordaland rett etter skjelvet.

– Det rista skikkeleg her, iallfall i eit halvt minutt. Eg lurte på om det var sprengningsarbeid eller jordskjelv og ringte kona mi som jobbar på Dale. Ho stadfesta at det måtte vera jordskjelv, for det hadde rista kraftig i pulten hennar, seier Krogsrud.

Jordskjelv med styrke 3,0 på Richters skala er ifølgje Storheim relativt sterkt i norsk samanheng.

– Men ein kan også forventa sterkare skjelv. Skjelv med denne styrken er ikkje daglegdags, men heller ikkje direkte uvanleg, seier ho.