I andre høve er det ei rein forretningsmessig vurdering som ligg til grunn.

Tida då den næringsdrivande også eigde forretningsgarden ein heldt til i, er definitivt forbi. I dag ser me at profesjonelle aktørar på eigedomsmarknaden kjøper opp forretningsgardar i sentrum. Berre unntaksvis er det snakk om lokale investorar.

At utanbygds aktørar «kjøper opp» Vangen er ikkje negativt. Tvert om viser det at dei har tru på kommunesenteret vårt. Me vil også tru at dei som går tungt inn i denne marknaden, har dei finansielle musklane som skal til for å utvikla eigedomane dei sikrar seg. Me har sett nokre uheldige døme på at dei gamle eigarane av forretningsgardar ikkje har vilja – eller kunna – bruka pengar for å ta vare på eigedomane sine. Då er det bra at meir profesjonelle aktørar kjem inn.

Selskapet som heiter Midgard Gruppen, har vore særleg aktiv i det siste. Dei sikra seg Vimi-bygget, som dei i ettertid har selt ut at ein del seksjonar frå. Dei kjøpte anlegget til Vatles handelsskule, der det i enno nokre år skal vera skule, inntil nybygget står klart på Skulehaugen. Kva planar dei så har, står att å sjå. Å byggja ut husvære her kan vera ein måte å nytta denne bygningsmassen på. Midgard Gruppen eig også Gjøsteinsbygget, og no har dei i tillegg sikra seg Voss Handelslag sitt bygg. I tillegg har dei kjøpt handelslaget sine aksjar i det planlagde parkeringsanlegget under Hestavangen.

At ein aktør satsar så hardt, tyder på sterk tru på Vangen som handelssentrum også i framtida. Det trengst, og det bør smitta over på andre som eig sentrumseigedomar. Vonleg vil denne investoren, og også dei andre som har kome inn på Vangen i det siste, oppgradera forretningsgardane sine, og slik bidra til at sentrum vert meir tiltalande og hyggeleg. Det er også viktig at alt forretningsareal på Vangen vert teke i bruk. For mange tomme lokale sender ut negative signal til omverda. Huseigarane må posisjonera seg til tunnelen bak Vangen står ferdig i 2013. Når tungtrafikken vert fjerna frå sentrum kan det endeleg skapast eit endå meir triveleg og menneskevenleg sentrumsmiljø.