– Kjønnsforskinga er godt etablert som eit eige forskingsfelt i Noreg i dag. Dei fremste forskarane på feltet hevdar seg godt i andre program i Forskingsrådet og på den opne arenaen Fri prosjektstøtte, seier Forskingsrådet i grunngjevinga si.

No skal kjønnsperspektivet i staden integrerast i forskinga generelt.

– Dette står høgt på agendaen til Forskingsrådet, og policyen vår er at kjønnsperspektiv skal integrerast i den forskinga Forskingsrådet finansierer, heiter det frå Forskingsrådet.

Fagmiljøa er likevel ikkje nøgd. Både Forening for kjønnsforsking i Norge og Senter for tverrfagleg kjønnsforsking (STK) ved Universitetet i Oslo skal i brev ha argumentert for at programmet burde halde fram også etter 2012, skriv Klassekampen. Halvparten av aktiviteten på STK blir i dag finansiert via Forskingsrådet.

Seksjonssjef ved STK, Oddrun Rangsæter, seier til Klassekampen at rådet i eit brev til Forskingsrådet bad om at programmet for kjønnsforsking skulle halde fram fordi faget ikkje er godt nok institusjonalisert.

– Fagrådet ved STK er uroa for at det Forskingsrådet kallar «kjønnsperspektiv» i realiteten blir til spørsmål om likestilling – kor mange kvinner som deltek på prosjektet og liknande, seier ho. (©NPK)