Streiken i offentleg forvalting har vart sidan 24. mai, og LO Kommune varslar no tredje runde med streikeuttak og tek samla ut 6.251 nye medlemmer.

Fagforbundet, som er det dominerande forbundet i samanslutninga LO Kommune, tek 6.142 nye medlemmer ut i streik frå onsdag og vil då ha til saman 30.371 streikande medlemmer i både fylke og kommunar. 18 nye kommunar vil bli berørt av opptrappinga til Fellesforbundet, dette er Nittedal, Ski, Hamar, Østre Toten, Kongsberg, Larvik, Lardal, Tønsberg, Kragerø, Grimstad, Froland, Tvedestrand, Kristiansand, Søgne, Sandnes, Hå, Os, Kvinnherad, Årdal, Rauma, Røros, Steinkjer, Sortland og Hammerfest.

Dispensasjonar

Fagforbundet held fram å ta ut medlemmer i barnehagar, skular og SFO, idrettsanlegg og svømmehallar. Første uttak omfatta hovudsakleg medlemmer i administrative stillingar.

Fagforbundet skriv i ei pressemelding at dei ikkje ønskjer å ramme tredjepart, og det er gitt dispensasjonar for barn og elevar med spesielle behov, vassverk, kloakk, reinhald, sjukeheim, vatn og avløp, skule, SFO, pleie og omsorg, slamkøyring, kulturarrangement, tur for psykisk utviklingshemma, reparasjon av rullestol, PU bustad, spesialundervisning, eksamen, sentralkjøkken, utbetaling av sosialstønad og krisesenter.

I tillegg varslar LO-forbunda Fellesorganisasjonen, Skolenes landsforbund, Musikernes fellesorganisasjon og El&IT-forbundet opptrapping, slik at LO Kommune til saman vil ha rundt 31.000 streikande frå onsdag.

Ikkje Unio

Unio som er den nest største hovudorganisasjonen som er i konflikt i KS-området, har ikkje varsla ytterlegare opptrapping. Arbeidstakarorganisasjonen som blant anna organiserer sjukepleiarar, lærarar og førskolelærarar har 14.900 streikande i kommunar og fylkeskommunar. Heller ikkje YS har enno varsla ei tredje opptrapping i kommunestreiken.

Streiken i kommunane har vart sidan 24. mai. (©NPK)