Levande bjørk i vinterkulda
Det er 25 minus og sylklar morgon ved Djukastein på Bulken. / Les saka
Bunnpris tek over for Spis Grilstad
Publisert: 18.12.09 kl. 07.23
Skribent: NPK
E-post: npk@npk.no
(NPK-NTB): Det var stor jubel blant dei Spis Grilstad-tilsette i Vestnes i Møre og Romsdal torsdag ettermiddag, då det blei kjent at drifta ved fabrikken held fram.
Grilstad trekkjer seg ut og har bestemt å leggje ned frå utgangen av mars. Frå 1. april tek Bunnpriskjeda over. Kjeda skal hovudsakleg produsera for eigne butikkar.
Etter nokre skjær i sjøen undervegs, blei Grilstad og Bunnpris-kjeda torsdag ettermiddag samde om vilkåra for ei overtaking. Dermed er dei fleste av dei 71 arbeidsplassane berga.
– Vi er sjølvsagt jublande glade. For oss er dette julekvelden på forskot, seier tillitsvald Aud Marie Bergdal ved Spis Grilstad til NTB.
Ho veit framleis ikkje kor mange som får halda fram når Bunnpris tek over, men håpar det omfattar alle 71 og at det etter kvart blir endå fleire.
Kjøpmann Erik Berg i Bunnpris Møre og konsernsjef Odd Arne Dalsegg i Spis Grilstad kjem fredag til Vestnes for å orientera dei tilsette. (©NPK)
