Levande bjørk i vinterkulda
Det er 25 minus og sylklar morgon ved Djukastein på Bulken. / Les saka
Kan spare 1 milliard på energieffektivisering
Publisert: 08.02.10 kl. 16.41
Skribent: NPK
E-post: npk@npk.no
(NPK-NTB): Kommunalminister Liv Signe Navarsete (Sp) oppmodar kommunane til sterkare innsats for å spare energi. Ho viser til berekningar som viser at kommunane kan spare 1 milliard kroner på dette.
– Det blir jobba bra med dette i mange kommunar. Det har skjedd mykje på kort tid. Me ser allereie mange gode prosjekt, seier statsråden som måndag innleidde på ein konferanse om klimaarbeidet i kommunesektoren.
Navarsete viser til at alle kommunar skal ha laga energi- og klimaplanar innan 1. juli i år.
– Status er at 126 kommunar har laga slike planar medan 234 har planar under arbeid. For dei som ikkje er kome i gang enno, byrjar det å haste, seier ho til NTB.
– Det er svært viktig at alle kommunar set i gang dette arbeidet. Kommunane bør ikkje vente på stortingsmeldingar eller klimaforlik, men sette i gang, oppmodar statsråden.
På konferansen oppmoda ho kommunane til å ta i bruk energisparekontraktar. Fleire kommunar har gått inn på dette og kan vise til gode resultat. (©NPK)
