Farne tider - 13. mars
Biletet er frå bryllaupet til Elisabet Prestegard Nyre og David Sausjord i 1928. / Les saka
MUSIKKGLEDE: Blokkfløyta er bytta ut med gitar og kjekt samspel på Bjørgum. Gjennom systematisk satsing på musikk kjempar Bjørgum no om Gullsekken og 100.000 kroner i prispengar. FOTO: DANIEL MELVE KVARME
Bjørgum spelar om Gullsekken
Publisert: 08.02.10 kl. 18.11
Skribent: Jan Egil Dyvik
E-post: th@avisa-h.no
VOSS: Som ein av to skular i Hordaland er Bjørgum nominert til Gullsekken. Prisen er verdt 100.000 kroner.
Det er gjennom «Den kulturelle skulesekken» alle skular i Noreg vert invitert til å søkja om å få Gullsekken. Det er fylkesmannen og fylkeskommunane rundt om i landet som kan nominera to skular kvar til denne prisen. Skulane som vert nominert må gje elevane kunst og kultur gjennom skulekvardagen.
Musikk og dans
Ved Bjørgum skule vert det arbeidd systematisk med musikkundervisninga. Elevane får prøva seg både med instrument som gitar, xylofon og trommer, dei får undervisning i dans og får òg prøva seg som komponistar.
– Det er veldig kjekt å verte nominert, seier kulturkontakt og lærar Olav Undeland.
Vert nøye vurdert
Dei to skulane i kvart fylke som vert nominert må gjennom nok eit nålauga før dei kjem til finalen. Ein sentral jury, med forfattar Erlend Loe i leiinga, skal vurdera kvar skule og plukka ut fire av dei nominerte til ei finale i april. Vinnaren får 100.000 kroner i Gullsekken.
– Dette er veldig kjekt og me er stolte, seier rektor Sissel Folkvord. Om Bjørgum til slutt står att som vinnarane av Gullsekken trur Undeland pengane skal rekkja langt.
– Me har eit svært godt samarbeid med FAU og vil strekkja ut desse pengane langt om me skulle få prisen, seier han. Kva ein sum eventuelt skal brukast til, har ikkje skulen tenkt på enda.
– Me er gjennom det første nålauga, og synes det er kjekt, seier Folkvord og Undeland. Men etter det «Hordaland» forstår er både nye instrument og kanskje ei CD-utgjeving høgt på ynskjelista.
TOR HALVORSEN | tekst
