Avisa Hordaland

Publisert: 09.02.10 kl. 12.37
Skribent: Sigrid Seim
E-post: ss@avisa-hordaland.no

ULVIK: Dei nesten 5.000 bøkene som Olav H. Hauge eigde skal denne månaden flyttast frå heimen hans på Rossvoll.

Olav H. Hauge-stiftinga har overteke denne boksamlinga, som enkja Bodil Cappelen i si tid  selde til Ulvik herad. Stiftinga ynskjer no å pakka ned bøkene for mellombels lagring i godkjende lokale. Når lokala i det tidlegare heradshuset er ferdig oppussa, skal bøkene koma på plass her.

FRÅ ROSSVOLL: Haugestiftinga planlegg å flytta bøkene frå Olav H. Hauge sin heim på Rossvoll. Arkivfoto

For litteraturinteresserte

Boksamlinga er av stor kultur- og litterturfagleg verdi, for alle som er interesserte i litteratur generelt, og ikkje berre for dei med sterk interesse for Olav H. Hauge, meiner Torunn Hovland Ljone, styreleiar i Haugestiftinga.

– Boksamlinga fortel oss mykje om Hauge sine interesser og kvar han henta all kunnskapen sin frå. Dessutan inneheld dei understrekingar og notatar som Hauge sjølv har gjort.

TIL HAUGESENTERET: I det tidlegare heradshuset i Ulvik skal boksamlinga med tida verta tilgjengeleg for ålmenta. Arkivfoto 

Juridisk vurdert

Haugestiftinga har ikkje kome til semje med dei lokale arvingane, som meiner boksamlinga er del av eit uskifta bu. Torunn Hovland Ljone seier dei likevel kjenner seg trygge på at dei har retten til samlinga, og viser til at dei har fått ei juridisk vurdering av spørsmålet.

Haugestiftinga meiner elles at Bodil Cappelen har sikra ei god offentleg forvaltning av arven etter Hauge, ved å overlata breva til Universitetet i Bergen, dagbøkene til Nasjonalbiblioteket i Oslo, og boksamlinga til Ulvik herad.

Interaktivt