Levande bjørk i vinterkulda
Det er 25 minus og sylklar morgon ved Djukastein på Bulken. / Les saka
Foto: Svein Ulvund
Ferja fekk motorstopp - går no som normalt
Publisert: 05.02.10 kl. 15.15
Skribent: Sigrid Seim
E-post: ss@avisa-hordaland.no
HARDANGER: MF Melderskin fekk motorstopp, og vart liggjande å driva utfor Brimnes med 31 passasjerar om bord. Sambandet går no som normalt att.
Eit oljerøyr sprakk og motoren måtte stoppast på ferja som var på veg til Brimnes i 13.30-tida fredag. Om bord var 31 passasjerar og 18 bilar, opplyser trafikksjef i Tide Sjø, Lars Juvik.
– Ferja Tysnes er no på veg frå sambandet Kvanndal-Utne-Kinsarvik, for å buksera Melderskin til kai. Seinare kjem MF Ølen inn for å få sambandet i gang att, seier Juvik.
Han vil tru Bruravik-Brimnes er ope att i 16 – 16.30-tida.
På Melderskin er motoren i gang att, men det står att ein del opprydding og reingjering, opplyser Juvik.
For å få kontroll på ferja som vart liggjande å driva vart det sett ut ein lettbåt frå Melderskin.
– Det var viktig å få kontroll på ferja ganske raskt, og det lukkast mannskapet med, seier han.
Til MF Tysnes er attende i sitt vanlege samband, er rute 2 mellom Kvanndal-Utne-Kinsarvik innstilt.
Tide melde fredag kveld at på grunn av at Melderskin blokkerte fjerjestøa på Bruravik, vart det sett opp mellombels rute Kvanndal - Kinasarvik inntil vidare. MF Ølen og Mf Tysnes vil trafikkera strekninga.
Frå klokka 23.20 fredagskveld gjekk ferjesambandet som normalt att.
