Tur frå Finden til Solrenningen
Finden er ein liten idyll på sørsida av Sognefjorden. / Les saka
KAN VERA ØYDELEGGJANDE: Bolstadmann Reidar Johan Tyssen trur at ein bomstasjon mellom Bolstadøyri og Dale kan verta øydeleggjande for bygdeutviklinga. ARKIVFOTO: JAN-EGIL DYVIK
Fryktar bomstasjon skal øydeleggja for nærmiljøet
Publisert: 26.07.10 kl. 15.25
Skribent: Stine Strand Carlsen
E-post: ssc@avisa-h.no
VOSS: Ein bebuar på Bolstad ber Voss kommune revurdera plasseringa av bomstasjonen.
– Prosjektplanane frå Vegvesenet viser at Voss får mange fine vegstubbar og rundkøyringar ut av «Vossapakko», men er eit sterkt avgiftsbelasta vegnett omkring Voss god nærings- og bygdeutvikling? Eg tvilar på det, skriv Bolstad-bebuar Reidar Johan Tyssen i eit brev til Voss kommune.
– Kan hindra utvikling og busetjing
Tyssen trur at ein bomstasjon mellom Voss og Vaksdal vil bli til stor skade for utvikling og busetnad i Bolstadgrendene i framtida.
– Kven vil busetja seg ein stad der du må betala 74 kroner i avgift kvar dag dersom du er avhengig av å bruka privatbil til og frå arbeid? Eller når du skal på nærbutikken, postkontoret, treningssenteret, symjehallen eller ein tur til nabobygda, spør Reidar Johan Tyssen.
Alternative løysingar
Bolstadmannen meiner at det må vera mogleg å finna alternative løysingar dersom ein vil at Bolstadgrendene skal kunna utviklast vidare.
– Kva med å plassera bomstasjonen mellom dei to avkøyringane Vassenden/Bolstad som finst i dag? Ein ville då få ein «bomfri» veg mellom bustad- og hytteområda på Bolstad til omverda. For å unngå «snikarar» måtte det vera fullt mogleg å stengja til dømes Rongavegen for gjennomkøyring, eventuelt med automatisk overvaking. Reint teknisk er ikkje dette eit problem i det heile, det er berre eit spørsmål om å visa litt velvilje, meiner mannen.
