Tur frå Finden til Solrenningen
Finden er ein liten idyll på sørsida av Sognefjorden. / Les saka
ORDFØRAR: Jan Ivar Rødland skal vera ordførar som før, men alle partiverv i Granvin Ap er frå onsdag kveld lagde ned. Arkivfoto: Sjur Herre
Granvin Ap legg ned alle verv - krev at Jens Stoltenberg personleg kjem til Granvin
Publisert: 07.07.10 kl. 23.33
Skribent: Rolf Tepstad
E-post: rte@avisa -hordaland.no
GRANVIN: Det vert ikkje masseutmelding av Granvin Ap, men alle tillitsvalde i partilaget legg ned verva sine. Slik vart utfallet av det ekstraodinære medlemsmøtet onsdag kveld.
Nær 30 personar var til stades på møtet, opplyser Jan Ivar Rødland, som var listetopp for Granvin Ap ved kommunevalet i 2007, og som sidan har vore ordførar i Granvin.
- Dette betyr at nær halvparten av partiet sine skrivne medlemer var til stades på møtet, som det tok tre klokketimar å gjennomføra.
SJEFEN SJØLV: Granvin Ap vil i prinsippet vera avvikla som partilag - like til Jens Stoltenberg har vore på vitjing i bygda. Arkivfoto: Ørjan Brattetveit.
- Statsministeren sjølv
- Partilaget krev no at statsminister Jens Stoltenberg sjølv skal koma til Granvin for å gjera greie for kraftline-vedtaket. Samstundes skal me i Granvin Ap visa han konsekvensane av vedtaket han og regjeringa sist veke gjorde. Stoltenberg vil bli varsla om vedtaket alt i morgon, seier ordførar Rødland.
- Og fram til han personleg har vore i Granvin og gjort som me krev, vil alle verva i Granvin Arbeidarparti vera nedlagde. Dette gjeld alle tillitsvalde frå styreleiar Bjørn Inge Folkedal og nedover i systemet, like til partiet si valnemnd.
Ordførar, som før
- Betyr det også at du sjølv ikkje vil vera ordførar lenger?
- Nei. For det er folket i Granvin som har valt meg til ordførar, ikkje partiet. Alle Granvin Ap sine representantar i formannskap og kommunestyre vil på same måte utføra jobben folket i Granvin har valt dei til, understrekar Jan Ivar Rødland.
