Levande bjørk i vinterkulda
Det er 25 minus og sylklar morgon ved Djukastein på Bulken. / Les saka
OPPHEVING: Granvin opphevar avgrensing av konsesjonsfritak for bustadeigedomar i heile heradet. Vedtaket vart gjort med tolv mot ei røyst.
Kvittar seg med null-konsesjon
Publisert: 16.12.09 kl. 15.37
Skribent: Anne Rivenes
E-post: ar@avisa-hordaland.no
Granvin heradsstyre opphevar null-konsesjon, for å gjera det lettare for unge å byggja eigen bustad.
Det store fleirtalet i heradsstyret i Granvin gjekk onsdag inn for å oppheva ordninga med null-konsesjon. Vedtaket vart gjort med tolv mot ei røyst. Martin Hamre (Sp) ville halda fast på noverande ordning, for å unngå at pengesterke bergensarar kjøper opp dei vakre eigedomane langs fjorden.
– Det er ikkje nullkonsesjonen, men mangel på tilrettelagte tomter, som gjer at det er lite bygging i Granvin, sa Martin Hamre.
Annlaug Haugse Såkvitne (Sp) har site i komiteen, som kom med ei samrøystes innstilling om å få slutt på null-konsesjon. Ho har tidlegare vore motstandar av oppheving, men både ho og fleire andre har snudd i løpet av prosessen.
– Ein kan bruka same argument for null-konsesjon som mot. Det er hårfine nyansar, og ikkje enkelt å seia kva som er rett og gale. Me skal vera klar over at ein del heilårsbustader vil verta brukt som fritidsbustader, åtvara Annlaug Haugse Såkvitne. For hennar del var det likevel viktigast å endra på at Granvin har ei særlov som set heradet i ein vanskelegare konkurransesituasjon enn naudsynt.
Opphevingsvedtaket er eit historisk vedtak, meiner granvinordførar Jan Ivar Rødland.
– Kva lyt heradet gjera for at det ikkje skal gå slik Martin Hamre fryktar?
– Me får sjå om det slår ut. Men me har andre reiskapar, til dømes plan- og bygningslova. Dessutan har me hjelp i å sjå på erfaringane frå grannekommunane, seier Rødland.
No skal heradsstyrevedtaket sendast til Landbruks- og matdepartementet, som føretek den formelle opphevinga av forskrifta som Granvin innførte i 1993.
