Avisa Hordaland

Publisert: 30.01.10 kl. 11.05
Skribent: Red. Sigmund Midttun
E-post: smi@avisa-h.no

Fleischer’s Hotel gjev opp Fraktgodsen. Det tidlegare kulturhuset vart ofra av politikarane for rundt tre år sidan. Fleischer’s overtok leigekontrakten og hadde tilsynelatande store planar. Etter nokre spede og halvhjarta freistnader vart det stilt.

Fraktgodsen opna dørene berre dersom utanforståande leigde seg inn i huset. Og etter det me har forstått har det ikkje nett vore billig å leiga lokala. I tida som har gått etter at hotellet overtok, er det heller ikkje gjort noko vesentleg innvendig.

No er det høgst uvisst kva som vert lagnaden til Fraktgodsen. Når Vossa Jazz 2010 pakkar saman utpå natta til 29. mars, har Rom Eiendom ingen leigetakar – så langt. Det er eigedomsselskapet til NSB som eig Fraktgodsen. Derifrå er signala klare: Dei ynskjer å leiga til nokon som vil vidareføra Fraktgodsen som kulturhus.

Feige politikarar torpederte eit folkeleg initiativ om å føra vidare Fraktgodsen for tre år sidan. No har nokre av dei same politikarane høve til å medverka til at dette folkelege kulturhuset kjem opp og går att. Men me ser dilemmaet; til hausten står Det Store Kulturhuset ferdig på bussgarasjetomta. At kommunen vil få ei utfordring med å få drifta av dette til å gå i hop, er me ikkje i tvil om. Likevel er det ikkje alle tilskipingar som vil høva i det nye kulturhuset. Mange arrangørar vil heller ikkje ha råd til å bruka det.

Det verste som kan skje med Fraktgodsen er at det vert ombygt til kontor eller lager. Då misser kulturlivet ein scene som har vore viktig, og som også bør vera det i framtida. Initiativ frå kulturlivet er kanskje i kjømda. Og dersom det kjem opp solide planar om å driva Fraktgodsen vidare som kulturhus, kan støtte frå Kulturrådet vera med å berga drifta. I så fall reknar me med at kommunen og fylket også vil delta i spleiselaget.

Fraktgodsen trengst framleis som kulturhus. Alle gode krefter bør dra saman for å få dette til.

Interaktivt