Avisa Hordaland

Publisert: 11.12.09 kl. 17.17
Skribent: Frode Rene
E-post: fr@avisa-h.no

VOSS: Kommunelege Richard Jacobsen på Voss krev at Jernbanetilsynet kjem med strakstiltak for å stogga plagsam støy til naboar til Voss stasjon.

I fylgje forvaltar i Jernbaneverket, Ole Magne Kjellevold, kan det ta svært lang tid før det vert gjort noko i denne saka. Sjølv har han opplevd at slike klagesaker har teke opp mot ti år å handsama. No er vona hans at NSB har ei løysing som kan setjast i verk snarast, for å unngå at den helseskadelege støyen held fram.

Kjellevold seier at det er mangel på parkeringsplassar til toga nattetid, som kan vera problematisk på Voss. Hans von er no at NSB kan finna løysingar som å slå av kompressorane eller parkera toga andre stader. 

NSB svarar

Informasjonssjef NSB, Preben Colstrup seier i ein e-post til «Hordaland» at det er grunn til å tru at  det vil verta reist sak mot NSB. Når det eventuelt føreligg ei rettskraftig avgjersle, kan det vera aktuelt å kommentera saka, skriv han. 

Strakstiltak

Det var etter at ein person som bur nær jernbanestasjonen på Voss, klaga på støy frå stasjonen at kommuneoverlege Richard Jacobsen tok til å sjå på saka. No krev han at det vert sett i verk tiltak snarast og ikkje ein gong i 2010, når Jernbaneverket skal ta til med det planlagde støyarbeidet på Voss. 

Interaktivt