Avisa Hordaland

Publisert: 14.12.09 kl. 12.57
Skribent: Rolf Tepstad
E-post: rte@avisa-hordaland.no

Torsdag kjem MAMA Arkitekter til formannskapet for å presentera sitt ferske innspel om korleis Tvildemoen skal utviklast vidare.

NYE TVILDEMOEN: Arkitektane Marina Bauer (t.v.) og Mari Myklebust med modellen dei har laga for korleis Tvildemoen kan vidareutviklast. Kommunalsjef Gunnar Bergo t.h. i biletet.  Foto: Rolf Tepstad

Høghus og tett utnytting er to av stikkorda i arkitektane Mari Myklebust og Marina Bauer sin framtidsvisjon.

Men dei ser også for seg at her bør etablerast ein grøn korridor tvers  over Tvildemoen, med rusleveg frå Strandaelva til Raundalselva, forbi den nyetablerte Voss Barnehage. Her meiner dei i tillegg det bør satsast verkeleg jordnært, kanskje med område undervegs der beitande sauer kan ha tilhald. I lenginga av denne grøne korridoren ser MAMA for seg ei gang- og sykkelbru over til Haugamoen.

I møtet mellom dei to elvane har dei to arkitektane elles teikna inn ein tumleplass for elvesport av ulikt slag, ein elvepark kort og godt.

MAMA Arkitekter har også tankar om køyremønsteret på Tvildemoen, og ynskjer mellom anna å dempa ned på trafikken forbi det etablerte buområdet på nordsida. I staden føreslår dei ein ny tilkomst inn mot dei næringsretta areala på sørsida, inn frå Brynagjelet ein stad.

Planane er alt presentert i Utval for næring og tiltak, som gav klart til kjenne at dei fann innspela spennande. Om reaksjonane vert tilsvarande positive i formannskapet – som også er planutval på Voss – vil MAMA Arkitekter sine tankar snart kunna verta retningsgjevande for den vidare utforminga av Tvildemoen.

Interaktivt