Tur frå Finden til Solrenningen
Finden er ein liten idyll på sørsida av Sognefjorden. / Les saka
STERK SIGER: Øyvind Heiberg Sundby drog i frå Kristen Skjeldal heilt frå starten av, og tok sigeren med god margin. Skjeldal gjekk inn til ein sterk andreplass. TORUNN TODAL LABERG | tekst og foto
Øyvind Heiberg Sundby for sterk for Skjeldal
Publisert: 03.07.10 kl. 18.01
Skribent: Torunn Todal Laberg
E-post: ttl@avisa-hordaland.no
VOSS: Lønahorgi Opp gjekk i dag av stapelen som NM i motbakkeløp, og vår eigen Kristen Skjeldal hevda seg godt i tøff konkurranse.
Øyvind Heiberg Sundby frå IK Tjalve i Oslo gjekk inn til ein sterk siger etter ein imponerande prestasjon opp bratta mot Kvilehytta under Lønahorgi. Alt frå starten av synte fjorårets norgescup-vinnar at han var sugen på siger, og opna knallhardt ut frå start.
– Det var fantastisk kjekt å ta gullet i dag, for i fjor tok eg sølvet etter å ha leia nesten heile vegen opp, sa han.
Kristen Skjeldal (foto) sette ny personleg rekord ved å springa om lag 45 sekundar raskare i år enn i fjor, og gjekk i mål på 55.55. Men Sundby slo han med god margin på tida 54.01.
Den unge turnusfysioterapeuten nyttar sommaren til å reisa rundt i landet for å delta i motbakkeløp, og målet er heilt klart å gjera om att suksessen frå i fjor og sigra i norgescupen.
Første løparen i mål i dameklassen var Heidi Veng, på tida 1.03.27.
Ny personleg rekord
– Øyvind var knallsterk i dag, og han seig i frå meg jamt og trutt heilt frå starten av, sa sølvvinnar Kristen Skjeldal, som likevel såg seg godt nøgd med andreplassen.
Kristen Skjeldal gjorde eit knallsterkt løp under årets NM i motbakkeløp, Lønahorgi Opp.
– Eg veit at det heiter seg at ein tapar sølv, men slik ser ikkje eg det i dag, sa han etter målgang.
– Det var fantastisk å springa her i dag, nydeleg vêr og eit supert arrangement. All honnør til Voss Oppturar, sa Skjeldal nøgd.
Flott arrangement
Dei som sytte for det flotte arrangementet i dag er Voss Oppturar - ei nemnd sett saman av representantar frå Voss IL, IL Ørnar, Bulken IL, Voss Friidrett, Stalheimskleiva opp og Voss Utferdslag.
FØRSTEDAMA: Heidi Veng tok sigeren i dameklassen.
Det var mykje publikum i løypa, og dei trøytte løparane vart piska vidare opp mot toppen av ivrige heia-rop.
Det var i tillegg mange påmelde i trimklassane, og desse samla seg langs løypa og i målområdet for å heia fram løparane i konkurranseklassane.
NM neste år finn stad i Ulvik, under Kvasshovden opp. Årets Kvasshovden opp går av stapelen om to veker.
