Tur frå Finden til Solrenningen
Finden er ein liten idyll på sørsida av Sognefjorden. / Les saka
RAS: Dåverande samferdsleminister Liv Signe Navarsete kom med lovnadar om pengar etter å ha sett på raset i Nærøydalen i september. ARKIVFOTO: TOR HALVORSEN
Rassikring kan kosta 600 millionar
Publisert: 02.12.09 kl. 11.42
Skribent: Tor Halvorsen
E-post: th@avisa-h.no
Det kan kosta så mykje som 600 millionar kroner å sikra E 16 i Nærøydalen mot ras. Statens vegvesen vurderer no fleire alternativ.
I fylgje seksjonsleiar Gunnar Søderholm ved planseksjonen i Statens vegvesen Region vest er ikkje den endelege rapporten klar.
– Me må jobba litt meir med alternativa før det vert ei avgjerd, seier Søderholm.
Ulike alternativ
Etter det «Hordaland» forstår er det tre konkrete alternativ som vert vurdert, tunnel, rasoverbygg eller rasvoll. Søderholm seier ein i tillegg må sjå på oppgradering av Sivletunnelen og Stalheimstunnelen.
E 16 i Nærøydalen vart i september i år stengd i fleire dagar grunna eit større ras. Sidan hausten 2008 har det vore fleire ras i området, noko som fekk Statens vegvesen til å starta opp arbeidet med å vurdera ulike løysingar for rassikring.
Omfattande
– Etter raset i september vart det eit større trykk på arbeidet, seier Søderholm. Mellom anna kom dåverande samferdsleminister Liv Signe Navarsete til Nærøydalen. Midt i valkampen lova ho pengar til rassikring.
– Etter raset måtte me gjera litt andre vurderingar kring kor omfattande tiltak me må inn med, seier Søderholm.
Inntil rapporten er klar vert det ikkje teken noko avgjerd.
– Me har tømt og reinska rasløpet, og bygd ein leievoll i løpet som skal ta av for nedfall. Me aukar òg beredskapen i området, seier Søderholm.
