Tur til Yksendalsstølen
I høve Eksingedalsmarknaden var det fellestur til Øksendalsstølen. / Les saka
-
Her går Sindre Hydle (10) i mål etter ein kjempeinnsats i skicrossløypa.
Alle foto: Frode Rene
Skicross i påskevêr
Publisert: 02.03.10 kl. 20.58
Skribent: Frode Rene
E-post: fr@avisa-h.no
110 born og ungdomar i alderen to til 16 år hadde ein draumedag i Årmotslia sundag.
For fjerde året på rad arrangerer Ørnar skicross for born og ungdom i alderen to til 16 år. Sundag var til saman 110 ungar i Årmotslia og kosa seg. Rennleiar Kolbjørn Sæten var godt nøgd med deltakinga, men vonar at endå fleire vil stilla til start neste år.
Gjekk åtte rundar
Ei av dei som gjekk løypa var vesle Mari Aaserød Berntzen (3,5) Etter fjerde runden var ho langt frå nøgd.
– Eg er ikkje ferdig enno, eg er ikkje ferdig enno, sa ho medan ho streva seg opp ein liten bakke i løypa. Bak gjekk smørjesjef, trenar og pappa Espen Berntzen for å motivera ho. Etter åtte rundar og minst ein time seinare, tykte Mari det var nok. Med «gullmedalje» rundt halsen, var det ei stolt frøken som sette kursen heim.
Gjekk 47 kilometer
Sindre Hydle (10) fortel at han har vore i knallhard trening framfor skicrossen sundag.
– Sist torsdag gjekk eg 21 kilometer i Bømoen, fredagen 13 kilometer, medan eg laurdagen gjekk 13 kilometer att, fortel han. Han legg til at han har trena ein del for å gjera det bra i dette rennet.
Sindre susa over målstreken i rakettfart, akkurat som alle dei andre og er stornøgd med innsatsen sin.
Likar best langrenn
Guro Tveito Øvsthus (12) har synt friske takter i vinter og var for så vidt nøgd med skicross-løpet sitt sundag òg.
– Eg greidde å hekta eine skia mi i ein stolpe, dermed tapte eg nokre verdfulle sekundar, fortalde ei smilande Guro etter løpet.
– Kva er kjekkast av skicross og langrenn, då?
– Eg likar best langrenn, men det er kjekt dette òg altså, legg ho fort til. Guro hamna til slutt på andreplass. Silje Fosse kom i mål tre sekund før Guro.
