Levande bjørk i vinterkulda
Det er 25 minus og sylklar morgon ved Djukastein på Bulken. / Les saka
Foto: Daniel Melve Kvarme
Sprengingsuhell i Mønshaugen
Publisert: 20.01.10 kl. 15.42
Skribent: Tor Halvorsen
E-post: th@avisa-h.no
VOSS: Ingen personar kom til skade då stein susa over riksvegen ved Mønshaugen og trefte eit hus.
Det var under arbeid med ny veg mellom Mønshaugen og Palmafossen at det gjekk gale under sprenging. Fleire steinar susa over vegen og trefte huset på motsett side av vegen.
Hol i taket
Minst tre større steinar trefte huset, mellom anna hamna ein stein på taket. Ein annan slo seg veg gjennom eit gjerde ikkje langt frå husveggen. Mellom bilane låg ein del småstein frå sprengingsuhellet. Korkje bilar eller folk vart råka av stein.
Arbeidstilsynet er varsla
Politiet fekk melding om uhellet ved 13.30-tida onsdag.
– Me fekk melding om eit sprengingsuhell. Det er ingen personar som er komne til skade, men det skal vera noko materielle skadar, seier politiførstebetjent Einar Bystøl ved Voss lensmannskontor. Han seier Arbeidstilsynet er varsla om saka.
– Veit politiet noko om korleis uhellet skjedde?
– Nei, me har berre fått melding om at noko gjekk gale under avfyringa av ei salve, seier Bystøl.
