PORTRETTET: Rektoren på Kløve
Kløve skule skal få leva. Torsdag kom gladmeldinga frå kommunestyret. / Les saka
Stor interesse for trafikksikring
Publisert: 05.02.10 kl. 08.15
Skribent: Tor Halvorsen
E-post: th@avisa-h.no
VOSS: Det har kome inn om lag 150 innspel til trafikksikringsplanen for Voss. No skal innspela vurderast og prioriterast. Måndag startar arbeidet med den nye planen for trafikktryggleik på voss for alvor. Då møtest gruppa for å gå gjennom alle innspela som er kome. – Eg har ikkje kome gjennom alle enno, men det ser ut til at det i alle fall er kome 150 innspel, kanskje fleire, seier Jørgen Steensæth i Voss kommune.
Fart og fotgjengarar
Innspela som er komne går i hovudsak på ynskje om fartsdempande tiltak og betra tilhøve for gåande.
– Utover våren skal me gå gjennom alle innspela og prioritera kva tiltak me skal setja i verk, seier Steensæth. Han seier det fins to typar fysiske tiltak.
– Det eine er investeringstiltak, som er store og kostnadskrevjande tiltak. Det andre er strakstiltak, som er mindre. I tillegg er det andre tiltak som går på haldningskampanjar og liknande. Dette er både politi og Statens vegvesen inne i. Kommunen deltek òg gjennom skulen, seier han.
Tverrfagleg arbeid
I gruppa som skal rullera planen sitt det representantar frå både Statens vegvesen, politi, skular og barnehagar og frå politisk hald i kommunen. Jørgen Steensæth sitt òg i gruppa.
– Ein representant frå Trygg Trafikk er òg invitert som ressursperson i starten av arbeidet, seier Steensæth. Arbeidet med planen skal vera ferdig til hausten, sidan konklusjonane i den oppdaterte planen skal vera med i kommuneplanen for Voss, som skal vedtas før jul.
