Avisa Hordaland

Publisert: 16.12.09 kl. 08.54
Skribent: Anne Rivenes
E-post: ar@avisa-hordaland.no

– Dei fleste er bestemte når dei kjem, men dei har gjerne spørsmål likevel, seier turnuslege Tine Vindenes.

I kjellaren på Park Hotel Vossevangen er det massevaksinering mot svineinfluensa denne veka. Røde Kors ordnar køen, og står for registrering og betaling.

– Det er samfunnsnyttig og førebyggjande arbeid, og me ynskjer å bidra i lokalsamfunnet, seier Elin Vandbakk, leiar i Voss Røde Kors Hjelpekorps.

Det er kommuneoverlege Richard Jackobsen svært glad for.

Kort ventetid

Tysdag var det hektisk ved oppstarten, fordi ein del hadde blitt sitjande utan kølapp.

– Det er litt løye system her, sa ei dame på veg inn til vaksinatøren.

– Det er mange inngangar til lokalet, folk kjem frå fleire stader, og frå kommunen si side er det litt dårleg skilta, seier Vandbakk.

Men det gjekk raskt å koma i orden, slik at køen krympa inn, og folk slapp å sitja lenge og venta på tur. Måndag var det ingen kø. Maks ventetid var 30 minutt. Og etter sprøytestikket må ein bli verande 20 minutt for å sjå at det ikkje oppstår reaksjonar.

Somme er engstelege

– Eg går rundt og ser korleis det går, seier turnuslege Tine Vindenes.

– Har det vore reaksjonar?

– Enkelte har kjent seg litt svimle. Det er gjerne folk som har vore litt engstelege på førehand. Utover det er det ingen alvorlege reaksjonar, seier Tine Vindenes.

– Er folk framleis litt i tvil når dei kjem her, om dei skal vaksinera seg?

– Dei fleste er bestemte når dei kjem, men dei har gjerne spørsmål likevel. Til dømes i høve til medisin dei tek, eller om dei skal ta vaksine dersom dei er forkjøla. Viss dei har feber eller kjenner seg uvel, tilrår me at dei ikkje tek vaksine no, seier Vindenes.

Interaktivt