Levande bjørk i vinterkulda
Det er 25 minus og sylklar morgon ved Djukastein på Bulken. / Les saka
TRAPPAR NED: – Eg gler meg til å bli kvitt budsjett- og personalansvaret, seier Magne Vassenden, som snart har stillingsnemninga «spesialrådgjevar». Arkivfoto
Vassenden vert spesialrådgjevar
Publisert: 17.12.09 kl. 18.28
Skribent: Rolf Tepstad
E-post: rte@avisa-hordaland.no
Kommunalsjef Magne Vassenden (58) vil i løpet av våren 2010 gå over i ny rolle i Voss kommune – som spesialrådgjevar ved rådmannen sin stab.
– Eg har passert 20 år i jobben som leiar for helse- og sosialetaten, med god margin, og synest det er nok. Må nok også tilstå at det skal bli godt å sleppa personal- og budsjettansvar, seier Vassenden i ein kommentar til «Hordaland».
Udlabua og Tvildemoen
– Kva arbeidsoppgåver skal du ha i di nye rolle?
– Det er enno eit stykke fram dit, og innhaldet i jobben er ikkje fastlagt. Men det manglar i alle fall ikkje prosjekt i helse- og omsorgssektoren. Her skal prosjekteringa på Udlabu-tomta vera klar til våren, det same skal avlastingstilbodet for born og unge på Tvildemoen, vidare har me den nye kommunale sjukeheimsavdelinga på Hagahaugen.
Den store samhandlingsreforma vil i tillegg få store konsekvensar for Voss kommune, seier Vassenden, som også spår at dette kan verta eit viktig framtidig arbeidsfelt for han.
– Eg kjem elles til å halda fram i jobben som kommunalsjef til ny sjef er tilsett, noko eg håpar er gjort innan sommaren 2010.
Vassenden opplyser at han har drøfta ein slik retrettstilling med rådmann Einar Hauge i fleire år, og at han difor er lukkeleg når han endeleg har fått avtalen i boks.
Nyskipa kommunalavdeling
Det var på Voss formannskap sitt møte torsdag at saka vart kunngjort for ålmenta, i samband med at ansvarsområdet for ei heilt ny stilling som kommunalsjef for kultur og fritid vart presentert.
– Men det er ikkje berre denne kommunalsjefstillinga me no skal lysa ut, sa rådmann Einar Hauge, og kunngjorde at Voss kommune faktisk har to ledige stillingar som kommunalsjef.
Kommunalsjefen for kultur og fritid vil få ansvar for område som bibliotek, kino, kulturhus, ungdomsarbeid, til dømes. I tillegg vil idrett vera sentral del av arbeidsfeltet.
– Burde han ikkje då heitt kommunalsjef for kultur, idrett og fritid, undra Sigbjørn Hauge (Sp).
– Idrett er del av det utvida kulturomgrepet, minna rådmann Einar Hauge om. Men han var samd i at idrettsdelen måtte vera sterkt understreka når instruksen for jobben vart utforma.
