Maid Memic skåra to av måla til Voss, medan innbytar Hans Skulstad Dregelid sette inn det tredje.

Årdal ville med siger ha gått forbi Voss, men måtte i staden bita i graset på heimebane då Voss tok sin fjerde siger på rad.

Etter at Maid Memic kom tilbake til Voss har det meste gått på skinner for laget. Memic har skåra heile 14 mål på seks kampar, og er no på delt 2. plass på toppskårarlista for avdelinga saman med Øystein Myrkaskog, Vik, etter kampane denne serierunden. I teten ligg Kristian Fardal Opseth hjå Førde, som skåra tre mål laurdag, og gjekk opp i 19 totalt.

I kampen laurdag dominerte Voss banespelet, og særleg får Eirik Een god omtale etter å ha styrt midtbanen for Voss. Det tok likevel si tid før det losna.

10 minutt ut i 2. omgang skaut Memic i stolpen, men nesten 20 minutt ut i 2. omgang losna det. Memic vart felt, fekk straffe, og sette sjølv ballen sikkert i nettet. 18-19 minutt før full tid la Maid Memic på til 2-0, og få minutt etter punkterte innbytar Hans Skulstad Dregelid kampen.

Mot slutten kom også unnguten Kristoffer Bidne (16) inn og debuterte for Voss.

Alt i alt eit kjempegodt resultat for Voss, som inntek ein solid 2. plass på tabellen etter Førde.