Nesten 5100 skyttarar har vore i aksjon ei heil veke på landets flottaste skytearena.

– Dette har vore veldig kjekt. Men no kjenner me at me byrjar å verta slitne. No skal me rydda vekk etter stemnet, men me står nok ikkje opp klokka 06.00 laurdag, seier Morten Helgaset medan han fredag kveld ber bort stolane publikum nytta då dei fylgde kampen om kongepokalen, som Hans Kristian Wear vann.

LES ÒG: Wear endeleg skyttarkonge

Arrangementet opna med prøvestemne og Militært-NM torsdag 9. august. Fredag avslutta stemnet med stang, felthurtig og NM i felt.

Jostein Bjørke, leiar av hovudkomiteen, er særs godt nøgd med gjennomføringa av arrangementet.

– Dette har gått heilt perfekt, smiler Bjørke.

Også generalsekretær i Det frivillige skyttarvesen, Jarle Tvinnereim er full av lovord.

– Landsskyttarstemnet på Voss har vore ei fantastisk oppleving. Veret har vore nydeleg, arenaen er flott og arrangementet har fungert. Og, ikkje minst, funksjonærane har vore hyggelege, blide og skikkeleg flinke, seier Tvinnereim.

SJÅ BILETE: Slik såg Bømoen camping ut frå lufta