Tur frå Finden til Solrenningen
Finden er ein liten idyll på sørsida av Sognefjorden. / Les saka
Foto: Stian Breivik
Krimteknikarar til brannstaden
Publisert: 02.06.09 kl. 12.05
Skribent: Anne Rivenes
E-post: ar@avisa-h.no
Politiet på Voss får assistanse av krimteknikarar frå Bergen i leitinga etter brannårsaka i Voss Gåveforretning.
- Det er eit lite mysterium korleis brannen har starta, seier brannsjef David Skjerven. Heller ikkje politiet har førebels noko klar meining om brannårsaka.
Starta i kjellaren
Klokka kvart på ni måndag kveld fekk brannvesen og politi melding frå forbipasserande at det var røyk inne i Voss Gåveforretning. Då brannvesenet kom til staden, var det stor røykutvikling i butikken.
- Brannen har starta i kjellaren, og det har truleg ulma lenge før det byrja å brenna oppover i etasjeskiljet. Der var det eit tjukt lag sagmugg, så brannen var vanskeleg å få tak i, seier brannsjef Skjerven. Han takkar det nye utstyret, det varmesøkjande kameraet og skjeresløkkjaren, for at sløkkearbeidet vart så effektivt.
Avhøyr og åstadgransking
Politiet på Voss etterforskar brannen.
- I morgon vil brannteknikarar frå Bergen saman med våre teknikarar undersøkja åstaden, seier politiførstebetjent Einar Bystøl.
I dag skal det gjennomførast ei rekkje avhøyr.
- Kven skal de snakka med?
- Det vert ulike vitne og innehavaren av forretninga, seier Bystøl.
- Mistenkjer de at brannen kan vera påsett?
- Det har me ingen haldepunkt for å seia, svarar politiførstebetjent Bystøl.
