PORTRETTET: Marta steg for steg
– Viss du skal eta ein elefant, må du dela han i små porsjonar! Marta Katrine Egdetveit ler godt og hjarteleg. / Les saka
Den indiske slidegitaristen Debashish Bhattacharya heldt opningskonserten under årets Vossa Jazz.
Krydra start på Vossa Jazz
Publisert: 03.04.09 kl. 21.38
Skribent: Anne Rivenes
E-post: ar@avisa-hordaland.no
Ivar Kvåle spelte lur, Arne Hjeltnes las dikt og Debashish Bhattacharya hylla kjærleiken.
Med Per H. Indrehus sin «Hymne til Vossa Jazz», framført av Ivar Kvåle og Jørund Indrehus, opna årets festival på den tradisjonsrike måten som må til for å få rette Vossa Jazz stemninga.
Ein berebjelke for Voss
Arne Hjeltnes stod for den offisielle opninga. Han viste til Voss sine lange tradisjonar med kulturliv, med naturopplevingar og festivalar.
- Heile tida med Vossa Jazz som ein pilar i profileringa av bygda, sa Hjeltnes. Han las sitt eige dikt om våren, om at det midt mellom silo og lembing er vår og Vossa Jazz.
- Høyr den feite sax'en. Kolve'n har teke turen heim, sa Hjeltnes, og fekk besøk på scenen og tonefylgje av nettopp saksofonisten Kolve.
Hylling til kjærleiken
- Eg misunner dykk. De bur i himmelen!
Debashish Bhattacharya er overbegeistra for Voss, og skildrar den store kontrasten frå ei roleg vestlandsbygd til ein travel og folketett indisk by.
Bhattacharya elskar gitaren høgare enn alt, og han gav publikum beskjed om å ikkje fortelja dette vidare til kona hans.
Kjærleik og sterke kvinner
Kjærleik var tema for konserten «O Shakuntala», den vilkårslause kjærleiken som me lett mister av syne i det travle dagleglivet.
Med seg hadde Bhattacharya tre perkusjonistar. Den eine er vetlebroren, Subhasis Bhattacharya. Dei to andre er noko så uvanleg som kvinnelege trommeslagarar frå India, der kvinner helst skal halda seg til song og dans. Chitrangana Reshwal og Charu Hariharan imponerte med rytmisk og melodiøst trommespel på Vossa Jazz sin opningskonsert.
