Avisa Hordaland

Publisert: 03.12.09 kl. 13.13
Skribent: Mette Vintertun, Solveig Mundal Alme og Caroline Pugh Vorland

Det nærmar seg jol og tida for jolebaksten står for døra.

Mange familiar har som ein fast tradisjon å samlast rundt kjøkkenbordet og høyra på jolesongar medan dei set saman årets peparkakehus. Difor synest me at det er ein god idé å dela ei oppskrift med dykk, tilfelle nokon har rota den vekk eller vil prøva ei ny.

Du treng:

• 1 ½ dl sukker
• 2 dl sirup
• 150g smør
• 2 ts ingefær
• 2 ts kanel
• 2 ts kardemomme
• 1 ts nellik
• 2 ts natron
• 1 egg
• Ca. 1l mjøl
• 1 knivspiss peppar

Smelt sukker, smør og sirup over svak varme. Tøm dette i ein bakebolle og rør i resten av ingrediensane.

Eit godt tips er å kna alt saman med hendene. Lat bollen med peparkakedeig stå kjøleg i 1-2 timar. (Kan òg stå til dagen etterpå)

Kjevl ut deigen til den er ca ½ cm tjukk. Det er om å gjera å få det så tunt som mogleg, om ikkje kan veggane på peparkakehuset bøya seg.

Skjer ut veggar, tak og vindauge til peparkakehuset, steik midt i omnen i 8-10 minutt ved 180 gradar, og avkjøl på rist når ferdigsteikt.

Lim saman tak og veggar med smelta sukker. Ver merksam på at det smelta sukkeret er svært varmt, så ver forsiktig.

Når huset er sett saman er det berre pynting som står att. Då kan du røra saman eggekvite og melis for å få ein melisglasur, og så kan dei som vil - pynta huset med ein heil haug med godteri.

Håpar de alle får ei god adventstid og lukke til med bakinga!

Interaktivt