Det fine sommarvêret let framleis venta på seg. Mange vakna opp til regn i dag tidleg, og det ser ikkje betre ut i dagane framover.

– Det ligg eit stort lågtrykk over Vestlandet, og det vert ganske så grått og trist vêr framover, fortel vakthavande meteorolog ved Vêrvarslinga på Vestlandet, Halldis Berge.

Opptil 40 mm i døgeret

Det kan verta nokre opphald mellom bygene i dag, laurdag, men nedbørsmengdane vil verta større ut over sundagen.

– Frå sundag av vil det koma aukande nedbør, og me skal ikkje sjå vekk i frå at det kan koma opp til 40 mm regn i døgeret. Temperaturane vil også synka noko. Dagane ut i veka ser ganske så våte ut også, dessverre.

Kan letta ut over veka

– Vil me i det heile tatt få brukande sommarvêr no i juli?

– Det ser ut til å letta litt på torsdagen, så me får kryssa fingrane for nokre soldagar heilt på tampen av månaden, seier Berge.