FINT PÅ VIKAFJELLET: Vakker solnedgang i november med 22 kuldegrader ned frå Fossfjellet. Finnbunuten i bakgrunnen. Foto: Sveinung Klyve

Vikafjellet lokkar med tidleg skiføre

Vikafjellet byr på fint skiføre alt frå november. Og her får du varierte turar i solfylt vinterlandskap heile vinteren.

Vikafjellet byr på fint skiføre alt frå november og her får du varierte turar i solfylt vinterlandskap heile vinteren.

For den som vil byrja skisesongen tidleg før skianlegga er opna og skiløyper er køyrde opp, er Vikafjellet eit fint utgangspunkt. Det er kanskje enno ikkje skiføre nede i dalen, men oppe på Vikafjellet på 1000 moh. er det frå november nesten alltid snø med fint skiføre.

Mange har oppdaga dette dei siste åra og jaktar på sol og snø i førvinterhelgane der oppe.

KUPERT LANDSKAP: Små menneske i stort landskap, ekstra kupert på førvinteren. Foto: Sveinung Klyve

Turen er målet

Terrenget er kantete og kupert, og liknar ofte meir på sommar no før større snømengder jamnar det heile til utover vinteren. Ver varsam med å gå på snødekte og islagde elvar og vatn tidleg på året, og hugs at det er både kaldt og tidleg mørkt. Ja nedi om lag 20 minusgrader er ikkje uvanleg på natta her oppe.

Vikafjellet er fint for alle aldrar og heile familien med pulk, akebrett eller ski. Hugs at turen er målet og du kan ha det like kjekt om du kosar deg i sola og lagar hopp eller skibakke like ved vegen, eller om du tek deg ein god dagstur.

Ofte ser du rype på turen,og er du ekstra heldig kan du av og til møta ein flokk med 100-300 reinsdyr som held til på Vikafjellet. Nyt synet, men ikkje fylg etter dei, fordi dei vert lett skremde og brukar då energi på å springa vekk.

1144-toppen eller Fossfjellet

Eit fint utganspunkt for turar på Vikafjellet er å parkera ved fylkesgrensa. På austsida er det solfylt, og slake dalar gjev fint skiføre sjølv om det ikkje er store mengder med snø. Dersom ein kort topptur er målet, kan du stiga innover og komma opp på den namnlause toppen merkt 1144 moh kartet. Du ser han til høgre opp frå parkeringa.

Held du fram nordover på baksida av toppen kan du gå ned på Kringlevatnet og vidare fram til Høgevarden. Her får du vid utsikt og fine nedrenn. Vil du ha ein lengre tur i austleg retning, kan du koma deg heilt på Fossfjellet. Dette er ein lang tur på om lag 20 km, og det det tek 5-6 timar.

Du går i kanten av Buførevatnet og Svartavatnet og opp eit markert skard med elveløp ut frå vatn 1171 moh. Utsikta frå toppen er praktfull mot Sognefjorden og rundskode med spisse fjell. Vil du ha ein litt lengre variant og rundtur, kan du skri ned i Dueskardet og ta vegen om Storegrungen attende. Her får du litt meir motbakkar og treng fort eit par timar ekstra.

Finnbunuten for brattkøyring

Dei som vil ha brattkøyring med randoneski, stoggar ved Finnbuene og går på Finnbunuten. Dei kjem ofte bratt opp og ned rett frå nord. Her er det fleire rasfarlege parti, så pass på. Der er også svært undersolt tidleg på vinteren, men gjev deg flotte og bratte nedrenn.

Den slakare og naturlege vegen for turskifolket er på venstre side av det markante og bratte Finnbugjuvet. Mot sør mot Myrkdalen skianlegg er det solrikt og fantastisk utsikt med flotte nedrenn.

MOT SOGNEFJORDEN: Skjelinganosi på 1331 moh. med Sognefjorden og spsse sognafjell i bakgrunnen. Foto: Sveinung Klyve

Skjelinganosi

Dersom det er svært lite snø kan du gå frå Skjellingen, og fylja vegen innover mot Selhamar. Frå Skjelingen tek det ca 2 timar å gå til toppen av Skjelinganosi, 1331 moh. Fylg vegen mot Selhamar ca 1,5 km og ta inn Snjodalen og opp langs kraftlinje mot vest. Du bryt så etter ca 1 time av og går i jamn stigning nordover mot toppen. Flott utsikt mot Sognefjorden og over Stølsheimen.

Vikafjellet

¤ Cirka 50 kilometer å køyra frå Voss sentrum og vel verdt køyreturen.

¤ Sendedalen: Fin familietur på ski og med pulk.

¤ Lengde: 5 km inn til Holmavatnet, ca 2 timar

¤ Høgdeskilnad: Turen går i lettgått og flatt terreng på ca 900 moh.

¤ Parkering: Ved Telehytta 3 km etter Holosvingane på Vikafjellet

¤ Finbunuten: Parker ved Finnbuene og ta over brua og mot toppen med ulike variantar. Bratt, om lag 2 timar opp.

¤ Start ved fylkesgrensa mellom Hordaland og Sogn og Fjordane:

¤ Til topp 1144 moh mot aust (namnlaus) 1 time opp, 200 stigning, fint nedrenn. Stemningstur. 2 timar til Høgevarden.

¤ Til Fossfjellet: 2-3 timar opp, 1-2 timar ned. Ca 20 km og 600 m stigning. Kupert terreng med fine nedrenn. For dei spreke.

¤ Skjellinganosi: ca 2 timar opp og 1 time ned. Ca 300 m stigning. Parkering ved hovudvegen ved starten på Selhamarvegen.

Skjellinganosi har snø lenge og du kan ofte gå dit til uti juni/juli. På returen kan du ta ein variant sørover til Skabotsfjellet og Grøndalsfjellet, dersom du er litt sprek og veret er bra.

Sendedalen med pulk og små ski

Ein flat og lett fin tur er å gå innover Sendedalen som passar for alle.

Stor parkering ved vegen like ovanfor den såkalla «Telehytta» ca 3 km ovanfor Holosvingane. Herfrå går det ofte skispor innover og løypa fylgjer den flate dalbotnen over vatna som ligg på rad og rekkje innover .

Tidleg på vinteren før vatna er trygge er det vanleg å gå på høgresida der turstien går om sommaren. Mange tek turen inn Sendedalen gjennom vinteren. Ikkje minst i påsken er det masse folk og det er eigna for heile familien å skri på akebrett, grava snøhole og kosa seg i sola.

Det er også svært eigna å dra pulk innover det flate terrenget, og det er lett for små ungar å fylgja løypa på eigne ski innover.

KAN TREFFA PÅ: Er du heldig, kan du treffa på ein flokk på 100-300 reinsdyr på Vikafjellet. Foto: Sveinung Klyve